|
|
|
|
Naebody
I'd like to catch a man whase name
Is Naebody;
When ocht gangs wrang, wha gets the blame?
This Naebody.
A' in the hoose are aye secure;
Oot o' the auld folks tak' the pooer;
When asked wha kicked up din an' stour,
'Twas Naebody.
When ocht gangs wrang, baith ear' an' late,
Puir Naebody
Aye gets the blame; he has nae mate,
Puir Naebody.
'Twas juist the ither nicht, nae later,
Aroon' the fire there wis some caper;
I syne got up, asked, "What's the matter!"
'Twas Naebody.
But after that I tried to fin'
This Naebody,
An' sae I caused nae little din,
Thro' Naebody.
The hale lot o' them in the hoose
Began to craw sae awfu' croose,
And said I'd quicker catch a moose
Than Naebody.
He maun be some auld-farrant chiel',
This Naebody,
Or e'en as clever as the deil,
This Naebody.
But maybe I'll come roon' him yet;
Then, by my certies, he will get
What he'll no bargain for, I'll bet,
That Naebody. |
|
|